දැනට චිකුන්ගුන්යා වසංගත රෝගය පැතිරීමේ අවදානම ප්‍රදේශ කිහිපයක පවතින බව වසංගත රෝග විද්‍යා අංශය සඳහන් කරයි.

විශේෂයෙන් කොළඹ දිස්ත්‍රික්කයේ කඩුවෙල, ගොතටුව සහ බත්තරමුල්ල යන ප්‍රදේශවලට හා ගම්පහ දිස්ත්‍රික්කයේ ජනාකීර්ණ ප්‍රදේශවලට මෙම රෝගය ව්‍යාප්ත වී ඇති බව වසංගත රෝග විශේෂඥ වෛද්‍ය චින්තන පෙරේරා මහතා පවසයි.

මෙම රෝගය 2006, 2007 සහ 2008 වසරවල දීද සැලකිය යුතු ලෙස ව්‍යාප්තවී ඇති බවද ඔහු සදහන් කළේය.

උණ, ඇඟපතේ වේදනාව, වෙව්ලීම, හන්දි වේදනාව සහ හන්දි ඉදිමීම මෙම රෝගයේ ප්‍රධාන ලක්ෂණ ලෙස දැක්විය හැකි බවද වෛද්‍යවරයා පවසයි. බොහෝ රෝගීන්ට දින කිහිපයක් තුළ මේ රෝගය සුව වුවද, සමහරුන්ට හන්දි වේදනාව දිගු කාලයක් පවතින බවද ඔහු තවදුරටත් සඳහන් කළේය.

චිකුන්ගුන්යා රෝගය ඩෙංගු ව්‍යාප්ත කරන මදුරු වර්ගය මඟින්ම ව්‍යාප්ත වන අතර, රෝගියෙකුගෙන් තවත් රෝගියෙකුට පරික්ෂණයකින් රෝගය බෝ නොවන බවද වෛද්‍ය චින්තන පෙරේරා මහතා පැවසීය.

ගර්භණී මව්වරුන්, ළමයින් සහ දීර්ඝ කාලීන රෝගී තත්ත්වයන්ගෙන් පෙළෙන පුද්ගලයින් මෙම රෝගය පිළිබඳව වැඩි පරිස්සමක් දැක්විය යුතු බවද ඔහු අවධාරණය කළේය.