හිටපු නියෝජ්‍ය අමාත්‍ය ආචාර්ය හර්ෂණ සූරියප්පෙරුම මහතා මුදල් අමාත්‍යාංශයේ නව ලේකම්වරයා ලෙස ජනාධිපතිවරයා විසින් පත් කර තිබේ.

ජනාධිපති මාධ්‍ය ඒකකය නිකුත් කළ නිවේදනයක සඳහන් වන්නේ, පසුගිය දිනවලදී විශ්‍රාම ගිය මහින්ද සිරිවර්ධන මහතාගේ පිටවීමෙන් පසු මෙම පත්කිරීම සිදු වූ බවයි.

මහින්ද සිරිවර්ධන මහතා ඉදිරි දිනවලදී ආසියානු සංවර්ධන බැංකුවේ (ඇඪ්ඹ්) විකල්ප විධායක අධ්‍යක්ෂවරයෙකු ලෙස වැඩභාර ගැනීමට නියමිතය.

ආචාර්ය සූරියප්පෙරුම මහතා ජාතික ජන බලවේගය නියෝජනය කරන ජාතික ලැයිස්තු පාර්ලිමේන්තු මන්ත්‍රීවරයෙකු වශයෙන්ද, වත්මන් රජයේ මුදල් සහ ක්‍රම සම්පාදන නියෝජ්‍ය අමාත්‍යවරයෙකු ලෙසද කටයුතු කර ඇත.

මුදල් අමාත්‍යංශ ලේකම් ධූරයට පත්වීම සඳහා ඔහු පසුගිය සතියේදී තම පාර්ලිමේන්තු මන්ත්‍රී ධූරයෙන් ඉල්ලා අස්විය.

යුරෝපාවේ විශාලතම ගිනිකන්ද ලෙස සැලකෙන එට්නා ගිනිකන්ද සක්‍රිය වී ඇති බව විදෙස් වාර්තා සඳහන් කරයි.

මෙහිදී කිලෝමීටර් කිහිපයක උසට අළු සහ දුමාරය වාතය මඟින් විසිරෙමින් පවතින අතර, එම ප්‍රදේශයේ සිටි සංචාරකයින් හා කදු නගින්නන් වහාම සුරක්ෂිත ස්ථාන වෙත ඉවත් කිරීමට බලධාරීන් ක්‍රියාත්මක වී ඇත.

එට්නා ගිනිකන්ද වසරකට කිහිප වතාවක් විදාරණය වන අතර, ලෝකයේ වඩාත්ම සක්‍රිය ගිනිකඳු අතරින් එකක් ලෙසද මෙය සැලකේ. මෙම වරින් වර සිදුවන ගිනාකාරී තත්ත්වයන්ට අලුතින් එකතු වුණේ ගිනිකොනදිග කුහරය සක්‍රිය වීමයි.

ඊයේ රාත්‍රියේ ආරම්භ වූ මෙම විදාරණයේ ශබ්දය සහ භූ කම්පනය, කිලෝමීටර් 50ක දුරින් පිහිටි කැටනියා නගරයට පවා දැනී තිබුණි.

ඒ අනුව ආසන්න ප්‍රදේශවල ජනතාව සුරක්ෂිත ලෙස තබා ගැනීම සඳහා ආරක්ෂක අංශවලට ක්‍රියාමාර්ග ගන්නට සිදු වී ඇති බවද වාර්තා වේ.

ඔස්ට්‍රේලියානු නියෝජ්‍ය අග්‍රාමාත්‍ය හා ආරක්ෂක අමාත්‍ය රිචඩ් මාර්ලස් මහතා හෙට (03) ශ්‍රී ලංකාවට නිල සංචාරයකින් එක්වීමට නියමිත බව විදේශ කටයුතු, විදේශ රැකියා සහ සංචාරක අමාත්‍යාංශය පවසයි.

ඔහු මෙම සංචාරය අතරතුර ජනාධිපති අනුර කුමාර දිසානායක මහතා සහ විදේශ කටයුතු, විදේශ රැකියා හා සංචාරක අමාත්‍ය විජිත හේරත් මහතා සමඟ හමුවීමට නියමිතය. තවද ඔස්ට්‍රේලියානු නියෝජ්‍ය අග්‍රාමාත්‍යවරයාගේ පැමිණීම සමරමින් ඔස්ට්‍රේලියන් හවුස් පරිශ්‍රයේදී විශේෂ දිවා භෝජන සංග්‍රහයක් පැවැත්වෙයි. එහි ප්‍රධාන අමුත්තා ලෙස අග්‍රාමාත්‍ය හරිනි අමරසූරිය මහත්මියද සහභාගී වේ.

මෙහිදී ඔස්ට්‍රේලියානු නියෝජ්‍ය අග්‍රාමාත්‍යවරයා ආරක්ෂක නියෝජ්‍ය අමාත්‍ය අරුණ ජයසේකර මහතා සමඟ ද්වීපාර්ශ්වික සාකච්ඡාවක් පැවැත්වීමට නියමිතය. සංචාරයේ ප්‍රධාන අරමුණ ලෙස දෙරට අතර ආරක්ෂක සහයෝගීතාව වැඩිදියුණු කිරීම සහ ද්වීපාර්ශ්වික සබඳතා තවදුරටත් ශක්තිමත් කිරීම නම් කර ඇත.

එමෙන්ම ඔස්ට්‍රේලියානු අග්‍රාමාත්‍ය කාර්යාලය, ආරක්ෂක දෙපාර්තමේන්තුව සහ විදේශ කටයුතු හා වෙළෙඳ දෙපාර්තමේන්තුව නියෝජනය කරන නිලධාරීන් කිහිපදෙනෙකු මෙම සංචාරයට එක්වීමට නියමිත බවද නිවේදනයේ වැඩිදුරටත් සඳහන් වේ.