ගාල්ල – ඉමදුව – අඟුළුගහ හන්දියේදී අද උදෑසන බස් රථ තුනක් එකිනෙක ගැටීමෙන් සිදුවූ අනතුරකින් මගීන් 29 දෙනෙකු තුවාල ලබා ඇති බව වාර්තා වේ.
අද පෙරවරු 8.30 ට පමණ මෙම අනතුර සිදුව ඇති අතර, පෞද්ගලික මගී බස් රථ දෙකක් සහ කාර්යාල සේවකයින් ප්‍රවාහනය කරමින් තිබූ බස් රථයක් ගැටීමෙන් මෙම අනතුර සිදුව තිබේ.

පොලිසිය පැවසුවේ එක් බස් රථයක් නවතා තිබී ඇති අතර තවත් බස් රථ 2ක් පිටුපසින් පැමිණි නවතා තිබූ බස් රථයේ ගැටීමෙන් අනතුර සිදුව ඇති බවයි.

තුවාල ලැබූ මගීන් 23 දෙනෙකු ඉමදුව රෝහලට රැගෙන ගොස් ඇති අතර තවත් 6 දෙනෙකු වැඩිදුර ප්‍රතිකාර සඳහා කරාපිටිය රෝහල වෙත මාරුකර යවා තිබෙනවා.

නව දුම්රිය කිහිපයක් ධාවනයට එක්කිරීමට දුම්රිය දෙපාර්තමෙන්තුව තීරණය කර තිබේ. ඒ සංචාරක කර්මාන්තය ප්‍රවර්ධනයට හා දුරගමන් සේවා වෙනුවෙනි.

විශේෂයෙන් උඩරට මාර්ගයේ දුම්රිය ගමන සංචාරකයින් අතර ජනප්‍රිය වීම, දැඩි ආකර්ෂණය සහ පවතින අධික ඉල්ලුම හේතුවෙන් මෙම පියවර ගන්නා බව දුම්රිය සාමාන්‍යාධිකාරී ධම්මික ජයසුන්දර මහතා පැවසීය.

ඒ අනුව ඇල්ල – ඔඩිසි – කැන්ඩි සහ ඇල්ල ඔඩිසි – නානුඔය ලෙස නව දුම්රිය දෙකක් පෙබරවාරි මාසයේ සිට ධාවනයට එක්කිරීමට නියමිත අතර, ඇල්ල ඕඩිසි – කලම්බු දුම්රියේ අමතර ගමන්වාරයක් ද යෙදවීමට නියමිතය.

ඇල්ල – ඕඩිසි – කැන්ඩි දුම්රිය පෙබරවාරි මස 01 වනදින සිට සෑම සති අන්තයකම මහනුවර සහ දෙමෝදර අතර ධාවනයට යෙදවන බව දුම්රිය සාමාන්‍යාධීකාරීවරයා සඳහන් කළේය.

එමෙන්ම ඇල්ල ඕඩිසි – නානුඔය දුම්රිය පෙබරවාරි මස 10 වනදින සිට, නානුඔය සහ බදුල්ල අතර ධාවනයට එක්කිරීමට නියමිත අතර කොළඹ සහ බදුල්ල අතර ධාවනය වන ඇල්ල ඕඩිසි – කලම්බු දුම්රියේ අමතර ගමන් වාරයක් පෙබරවාරි මස 10 වනදා සිට සෑම සඳුදා දිනයකම කොළඹින් පිටත්වීමට සහ පෙබරවාරි 11 වනදා සිට සෑම අඟහරුවාදා දිනකම බදුල්ලෙන් පිටත්වීමට නියමිතය.

මීට අමතරව ජනවාරි මස 31 වනදා සිට කොළඹ සහ කන්කසන්තුරෛයි අතර රාත්‍රී තැපැල් දුම්රිය දිනපතා ධාවනයට එක්කරන බව දුම්රිය සාමාන්‍යාධිකාරී ධම්මික ජයසුන්දර මහතා වැඩිදුරටත් සඳහන් කර සිටියා.

වත්මන් ගුවන් හමුදාපති එයාර් මාෂල් උදේනි රාජපක්ෂ මහතා එළැඹෙන 29වනදා ධුරයෙන් විශ්‍රාම යෑමට නියමිතව තිබේ.

සේවා දිගුවක සිටින උදේනි රාජපක්ෂ මහතා එම ධූරයට 2023 වසරේ ජූනි මස තේරී පත් වූ අතර, මෙරට 19වන ගුවන් හමුදාපතිවරයාය.

වත්මන් රජය 2024 වසරේ දෙසැම්බර් 31 දිනෙන් පසු සේවා දිගු ලබා නොදීමේ ප්‍රතිපත්තිමය තීරණයක් ගත් අතර, ඒ හේතුවෙන් මෙලෙස වත්මන් ගුවන් හමුදාපතිවරයා ධුරයෙන් විශ්‍රාම යෑමට නියමිතව ඇත.

ඒ අනුව නව ගුවන් හමුදාපතිවරයා ලෙස එයාර් වයිස් මාෂල් වාසු බන්දු එදිරිසිංහ මහතා පත්කිරීමට නියමිතව තිබේ.

වත්මන් ගුවන් හමුදා සැලසුම් අධ්‍යක්ෂක ලෙස කටයුතු කරන එදිරිසිංහ මහතා 1991 වසරේ දී 24 වන බඳවා ගැනීම් කැඩෙට් නිලධාරියෙකු ලෙස ගුවන් හමුදා සේවයට එක්ව තිබේ.

1970 වසරේ මහනුවර දී උපත ලැබූ වාසු බන්දු එදිරිසිංහ මහතා මහනුවර ශාන්ත සිල්වෙත්තර විදුහලේ ආදි සිසුවෙකි.